الليزك السطحي PRK

تصحيح الابصار بالليزك السطحي PRK  من أشهر أنواع الليزك حاليا رغم ان تقنيته بقالها فتره مش قصيرة .

طيب ايه فكرته ؟

وايه اللي يميزه عن غيره ؟

وايه عيوبه ؟

الليزك او تصحيح الابصار عموما فكرته باختصار تغيير تحدب القرنية .

طبعا لازم تكون القرنية سليمة وسماكتها تستحمل .

بس النوع المشهور باستخدام مشرط او بيسمى Flap LASIK بنشيل فيه اول طبقة في القرنية بشكل مؤقت اثناء العملية .. وفي آخر العملية بنرجع الطبقة دي تاني. ولكن الأسلوب ده ممكن نقابل فيه مضاعفات اثناء وبعد العملية .

من هنا كان استخدام الليزك السطحي PRK مختلف ان اول طبقة بيتم ازالتها بشكل كامل اثناء العملية .

طبعا ده بيتم بأسلوب وتقنية محسوبه بحيث ان الطبقة دي تتشال بشكل متساوي وتسمح للعين بانها تكونها تاني بعدين .

مزايا الليزك السطحي PRK كتير زي :

• بيكون أفضل لو سماكة القرنية متنفعش لليزك العادي . بس بردو ليها حدود.
• مبنقابلش فيها مشاكل استخدام مشرط اثناء العملية زي الليزك العادي او الفمتو ليزك .
• مبنخافش من مخاطر دعك او حك العين بعد العملية اللي ممكن يسبب مشاكل في القرنية ان الفلاب يكرمش مثلا.
• مبيظهرش أثر واضح للعملية بعد فترة التئام القرنية . وده بيفضله شباب كتير اثناء تقديمهم لكليات تحتاج نظر سليم . ولكن لو في الفحص طلبوا منهم يتعمل أشعة تخطيط قرنية وقتها بيبان فيها أثر العملية بوضوح جدا .

عيوب الليزك السطحي PRK اللي ممكن تحصل:

• ألم شديد بعد العملية لمدة يومين يحتاج مسكنات .
• طول فترة النقاهه للعين لحد مالؤوية تستقر ممكن تستمر لشهور.
• ممكن حدوث تغبش او HAZE على القرنية يؤثر على “جودة” الصورة.

مين ينفعله ليزك سطحي PRK ومين مينفعلوش ؟

مبدأيا أي نوع من أنواع الليزك سواء ليزك سطحي او ليزك عادي او فيمتو ليزك او فيمتو سمايل .. بيحتاج شرطين أساسيين هم ثبات النظر وسلامة فحوصات القرنية والعين.

بعد كده تحديد النوع المناسب بيكون بالنقاش مع الطبيب بناء على درجة الضعف ودرجة سمك القرنية وطبيعة الشخص وظروف حياته وعمله .لأن مثلا ممكن في حالات يكون مناسب لسيدة ربة منزل ميكونش مناسب لواحد بيسوق بالليل كتير .

دكتور إبراهيم عبداللطيف

حكيم العيون

*** أي معلومات عالموقع هي بغرض التثقيف الطبي والتوعية الصحية العامة ولا تغني بأي شكل من الأشكال عن الفحص الطبي المباشر .