كسل العين من اكتر مشاكل العيون في ضعف النظر اللي عامل الوقت فيها مهم جدا
كسل العين او خمول العين هو مشكلة ضعف نظر في الأساس
هل في عملية لعلاج كسل العين؟
هل كسل العين له علاج في الأطفال والكبار ؟
هل في أدوية لعلاج كسل العين ؟
….قبل أي حاجه لازم نعرف أساس المشكلة
احنا عشان نشوف أي حاجه في الحقيقة بنشوفها بالمخ (مركز الابصار)
والعين هي مجرد أداة لتوضيح الصورة وتوصيلها للمخ
لو هنشبهها بحاجه زي الكاميرا
فالعين زي نظام العدسات .. ومركز الابصار في المخ زي السنسور او فلم الكاميرا
فالمسؤول الرئيسي عن ظهور الصورة في الآخر وترجمتها هو مركز الابصار او سنسور الكاميرا
واحنا عندنا نظامين عدسات مش نظام واحد لأننا بتشوف بعينين مش عين واحده
والمخ مسؤول بنظام ذكي جدا انه يدمج الصورتين لصورة واحده
بس عشان ده يحصل لازم يكون الصورتين مقاربين لبعض
اما الاتنين اقويا او حتى الاتنين ضعاف
بس لو فيه فرق كبير بين الصورتين وقتها نظام الدمج اللي في المخ ده مبيعرفش يخلي الصورتين صورة واحده
فبيقرر من نفسه يختار الصورة الأقوى ويتجاهل الصورة الأضعف .
المشكلة في كسل العين بتبدأ بعدها ان العين اللي بييجي منها الصورة الأضعف مع الوقت المخ بينساها
وحتى مع لبس نظارة مقاسها مناسب لضعف العين
بيكون صعب عالمخ تقبل استقبال صورة منها
ولو فضل لفتره طويله في سن الطفوله لحد 13 او 16 سنه كسل العين بيثبت عالوضع ده.
طب هل في علاج دوائي لكسل العين ؟
للأسف غير معتمد حتى الآن دوا شرب او كبسولات او عملية لمركز الابصار يخليه ينشط أكتر
طيب الحل ؟
الحل لكسل العين باختصار شكل من اشكال العلاج الطبيعي
بنحاول نعيد تذكير المخ بالعين الكسلانه الضعيفه .
وده بيكون عن طريق تمارين تغطية للعين
بحيث نغطي العين القوية ونخللي الصورة الوحيده الواصله للمخ هي من العين الضعيفه فيضطر يحاول يشغلها
وطبعا ده أثناء لبس مقاس النظارة المناسب
التمارين لكسل العين مدتها بتتختلف حسب درجة الكسل والسن وبيحددها الطبيب بعد الفحص
وطبعا طبيعي الطفل بيكون غير متقبل للتمارين في الأول
لأننا بنحرمه من الصورة الواضحه ونطلب منه يعتمد وقت التمرين على صورة مزغلله وضعيفه
فبطلب دايما من الأهل الصبر ومسايسة الطفل قدر الإمكان .
وبنرجع نتابع كل شهر او 3 شهور بالكتير ونشوف مدى تحسن قوة الابصار في العين الكسلانه.
وممكن نستمر عالموضوع ده سنوات عادي.
لأن تاني لو الطفل وصل لسن 13 ل 16 سنه بعدها كسل العين لا بينفع معاه تمارين ولا نظارة ولا ليزك ولا أي علاج مثبت حتى الآن.
التغطية بتكون اما بلزق او غطاء عين ..
واوقات ممكن نستخدم قطرة تخللي العين القوية تشوف الصورة ضبابيه مؤقتا..
بس استخدام القطرة غير مستحب لصالح غطاء العين العادي.
وفي نظارات شركات عملتها بيكون فيها نفسها غطاء ناحية العين الأقوى ..
ولكن فيه حالات قليلة ممكن نحتاج عملية تساعدنا قبل مانبدأ التمارين.
زي لما يكون فيه فرق كبير جدا بين مقاس العينين وقتها النظارة بتكون غير كافيه وبنحتاج تصحيح جزئي بالليزك .
او لو فيه ميا بيضا في العين الكسلانه بنحتاج نعمللها إزالة في اسرع وقت.
غير كده كسل العين حله الأساسي تمارين التغطية في الأطفال.
أتمنى أكون وضحت الموضوع ده بشكل مختصر ووافي ومبسط
وأي حد محتاج استفسار يبعتلي في التعليقات او على السوشيال ميديا
دكتور إبراهيم عبداللطيف
حكيم العيون
** أي معلومات عالموقع هي بغرض التقيف والوعي الصحي العام ولا تغني بأي شكل من الأشكال عن الفحص الطبي المباشر .
