أي حد في الدنيا بيتمنى طفله يكون شكله جميل وعينه سليمة
وبالتالي لو لاحظ ان في انحراف او عدم تناسق في العينين بيبقى بيدور على حل سريع .
فبقابل دايما أهالي عندهم يقين ان ابنهم او بنتهم عندها حول
اما هم شايفينه كدا
او حد من قرايبهم وصحابهم شايف كده ولفت نظرهم
بنيجي نشوف الطفل نلاقي مافيش حول حقيقي في العين
طيب اللي هم شايفينه ده ايه ؟؟؟
ده بيكون ايحاء بوجود حول
وده بيحصل نتيجة صغر فتحة العين مقابل حجم كورة العين
فابيخللي العين أوقات من زوايا معينه او لما يبص في اتجاه معين جزء من نني او حدقة العين يختفي تحت حرف العين من اتجاه المناخير فيتهيألنا ان العين فيها حول داخلي لجوا.
وده بيظهر أكتر في رسمة العين الآسيوية .
في أوقات الطفل لما يكبر وفتحة الجفن او رسمة العين تكبر … نلاقي الظاهره دي معدتش واضحه زي الأول .
وفي أطفال رسمة عينهم بتفضل كده.. بس بيظل حول وهمي او حول كاذب مالوش أي ضرر على العين او الرؤية.
طيب احنا كدكاترة بنعرف نفرق ازاي ؟
بنعمل فحص شامل للعين في جميع الاتجاهات نطمن ان فعلا فعلا مفيش حول .. وبنبص او نصور العين قدام الأهل وفلاش الكاميرا اوكشاف شغال بشكل عمودي عالوش..ولو لقينا انعكاس النور جاي في نص حدقة العين بالتوازي في العينين مع بعض زي الصورة دي .. يبقى مبدأيا مفيش حول .
ولو لقينا انعكاس النور مش نفس المكان في العينين يبقى احتمال فيه حول حقيقي .
من الآخر :
أي أب او أم الأفضل عشان يطمنوا لو عندهم شك في وجود حول يروحوا لطبيب عيون أطفال عشان يفصل هل ده حول حقيقي ولا حول كاذب او وهمي.
دكتور إبراهيم عبداللطيف
حكيم العيون
*** أي معلومات على الموقع هي بغرض التثقيف والوعي الصحي فقط ولا تغني بأي شكل من الأشكال عن الفحص الطبي المباشر .
