أحد أسباب العمى هو مرض تصبغ الشبكية Retinitis Pigmentosa
بشكل او بآخر بيحصل تلف لمستقبلات الضوء في شبكية العين نتيجة المرض ده
بيكون غالبا بسبب خلل جيني
ودرجته وأعراضه بتتفاوت من شخص للتاني
مرض تصبغ الشبكية ممكن يوصل لبعض الأشخاص للعمى الكامل.
أغلبنا سمع عن أبحاث خلايا جزعية …
او شرايح الكترونية …
لكن المفاجأه ان الكشف العلمي المبهر حاليا جاي من “الطحالب”
ايون .. زي ماقريت كده … طحااالب !!
طب ايه اللي جاب الطحالب للعين ؟؟
جزء من مراحل تكوين الصورة في العين بيعتمد على عملية كيميائية لمستقبلات للضوء في الشبكية بتحول الضوء لاشارة كهربية عشان تروح للمخ يترجمها للصورة الاصلية.
المستقبلات دي بقى هي اللي بتتلف في مرض تصبغ الشبكية
والعلماء في 2006 اكتشفوا ان الطحالب فيها تركيبه جينية مشابهه بتتجه نحو الضوء وبتستثار بيه.
وكانت تجاربهم في البداية على الفيران
واستخدموا طريق ومجال علمي واعد اسمه Optogenetic
“علم البصريات الوراثي”
فقالوا طب مانحط ده على ده .
وطبعا قد مالفكره تبدو سهله ولكن تطبيقها احتاج أبحاث وتجارب اكتر من 15 سنه .
بس لقوا التركيبه اللي اخدوها من الطحالب عندها شرط مصممه عليه ان الضوء اللي يشغلها يكون “مصفر” او AMBER LIGHT
مؤخرا في مركز أبحاث في باريس أجروا تجربه على متطوع مجهول مصاب بالعمى تماما من 40 سنه .
وحقنوه بالماده دي للشبكية
ولبسوه نظارة مخصوص تحول الصوره اللي بيشوفها لضوء مصفر عشان يعجب التركيبة الجينية اللي جابينها من الطحالب.
وبعد تمارين وتجارب المخ بدأ يستوعب الطريقه والشكل الجديد اللي الصورة بتجيله بيه؟
وقدر يميز حدود أشكال بسيطه
وحتى قدر يميز الخطوط البيضا بتاعة عبور المشاه عالأرض
طبعا صعب حاليا ومرة واحده يشوف بنفس حدة وكفاءة الشخص الطبيعي..
بس ان شخص كفيف تمام يبقى قادر يشوف خيالات او حدود الأشكال ده حدث عظيم جدا
وهيدي أمل في المستقبل ان شاء الله بعلاج لفقدان البصر لناس كتير .
دكتور إبراهيم عبداللطيف
حكيم العيون
**** أي معلومات عالموقع هي بغرض التثقيف والوعي الصحي ولا تغني بأي شكل من الأشكال عن الفحص الطبي المباشر .
