تحدثنا في مقال آخر عن ضرورة فحص عيون الأطفال. ومن ضمنهم الأطفال المبتسرين . وذلك خوفا من احد اخطر مشاكل الشبكية اللي ممكن تهدد نظر الطفل بشكل دائم وهو اعتلال الشبكية retinopathy of prematurity.
اعتلال الشبكية للأطفال الخدج او المبتسرين من أكتر الأمراض أو المشاكل اللي ممكن تقلق الأهل لو الطفل اتحجز في الحضانه .
وبيبقى فيه خوف على نظر الطفل
هل هو سليم ؟
هل بيشوف كويس ؟
المشكلة ان الطفل في المرحلة دي استحالة يشتكي او يعبر .
طيب ازاي نعرف؟
قبل أي حاجه لازم نفهم باختصار سريع الوضع الطبيعي عشان نفهم المشكلة :
شبكية العين بتاخد وقت متأخر عشان نموها يكتمل
والشبكية هي عبارة عن بطانة العين الداخليه
وهي الجزء الحساس الأهم المسؤول عن استقبال الصورة ونقلها للمخ
والطبيعي يكون ماشي فيها شرايين دم
الشاريين دي لما بتتكون بتحتاج نسبة أكسجين محدده جدا
نسبة وتناسب
كل مالأكسجين الواصل زاد كل مالشرايين اللي بتتكون بتزيد
وسبحان الله بتكون النسبة دي محسوبة ودقيقة أثناء الحمل الطبيعي داخل الرحم .
امتى تحصل مشكلة اعتلال الشبكية للمبتسرين ROP ؟
لو الطفل اتولد قبل معاده ولسه الشرايين مكتملش نموها في الشبكية
وده غالبا بيكون قبل السبوع 32 من الحمل
وقتها الطفل بيحتاج يتحط في حضانه
والمفروض جوا الحضانه يتوفرله بيئة قريبة من اللي كانت جوا الرحم
من ضمنها الأكسجين
مشكلة اعتلال الشبكية للمبتسرين ROP بتحصل لما نسبة الأكسجين اللي رايحه للطفل تكون اكثر من الطبيعي
وقتها سرعة ومعدل نمو شرايين الشبكية اكبر من الطبيعي
طيب ليه نمو شرايين زياده في الشبكية بسرعه حاجه خطر ؟
عشان العين ليها احتياج محدد ودقيق من الشرايين
ولو حصل زياده فيها بتذبل وتتليف مع الوقت
وقتها ده بيكون مصدر الخطر
التليفات دي ممكن تسبب مشاكل متفاوته في العين أخطرها هو العمى .
هل دايما بيكون اعتلال الشبكية للمبتسرين ROP خطير ؟
لأ
بنقسم اعتلال الشبكية للمبتسرين حسب الفحص لدرجات
في منها بيكون بسيط جدا مبيحتاجش تدخل وبيخف لوحده
ومنها اللي بيكون خطير وبيحتاج تدخل في أسرع وقت
بنعرف ازاي درجة الضرر في اعتلال الشبكية للمبتسرين ROP ؟
عن طريق فحص مباشر لقاع العين بمنظار مخصوص للفحص
ايه أنواع التدخل الجراحي المتاح ؟
في أنواع مختلفة زي ليزر او تبريد او أدوية مثبطة لنمو الأوعية
واللي بيحدد النوع المطلوب هو الطبيب المختص حسب الوضع
هل التوقيت بيفرق في تشخيص وعلاج اعتلال الشبكية للأطفال المبتسرين ROP ؟
اه طبعا كل ماكان التدخل أسرع كل ماكان فرص انقاذ العين أفضل
في الآخر بنصح الأهالي بالتعامل مع الموضوه باهتمام وحكمه بدون هلع وبدون استهتار في نفس الوقت .
يعني نمشي خطوة بخطوة
لو الطفل مولود بدري واحتاج حضانه يبقى نطمن ونطلب فحص قاع عين ليه
ولو الفحص أظهر وجود مشكلة يبقى نتعامل مع الوضع بعدها حسب إرشادات الطبيب
ومفيش أي ضرر او حرج من أخذ مشورة أكثر من طبيب مختص لو كان في قرار تدخل لعلاج اعتلال الشبكية للمبتسرين ROP بس يكون في أسرع وقت بدون مماطله او تأخير .
وربنا يحمي أطفالنا من كل شر وسوء
دكتور إبراهيم عبداللطيف
حكيم العيون
*** أي معلومات عالموقع هي بغرض التقيف والوعي الصحي ولا تغني بأي شكل من الأشكال عن الفحص الطبي المباشر .
نعرف ازاي الطفل بيشوف ولا لأ
ربنا يسترها على ولادنا