مؤخرا ظهرت مشاهدات لمرض الفطر الأسود
رغم انه مرض الفطر الأسود قديم لكن ظهروه حاليا ارتبط بحالات إصابة بالكورونا
وأشهر إصابة الفترة اللي فاتت في مصر كانت للفنان سميرغانم قبل وفاته متأثر بالكورونا
وأول مشاهدات كتير ارتبطت بالكورونا مؤخرا كانت في الهند
وكانت تبريرات الدكاترة هناك لسببين :
الأول ان في هنود بتعتقد ببركة البقر وبراز البقر وبيغسلوا جسمهم بيه تصورا انه هيشفيهم من الكورونا..وان الفضلات دي كانت سبب تكون الفطر الأسود.
السبب التاني طبيعة الجو وظروف المعيشه عند نسبة كبيرة من المصابين بيغلب عليها الحر والرطوبه اللي بيكونوا بيئه مناسبة للفطر الأسود.
ايه سبب الفطر الأسود ؟
السبب الرئيسي وجود الفطر في بيئة المصاب مع تدهور مناعته .
عشان كده المرض مش جديد . وكان بيظهر عموما لأي مريض مناعته ضعيفة جدا . وعشان الكورونا في حالاتها الشديده بتضعف المناعه جدا . أصبح مريض الحالات الحرجه للكورونا عرضه للفطر الأسود.
واوقات الفطريات بتنشط من الأغشية المخاطية للمريض نفسه بغض النظر عن البيئة المحيطة.
أعراض الفطر الأسود ؟
الفطر الأسود ممكن يصيب أماكن كتير في الجسم ويسبب التهاب فطري حاد فيها .. زي الجلد والأنف والعين .
وانتشاره في الجسم بيسبب حمى .
ولو وصل للعين بيأثر سلبا على العين وبيضعف النظر وممكن يؤدي لفقدانها .
الوقايه من الفطر الأسود؟
محورين مهمين ..
الأول تقوية المناعه قدر الإمكان وعلاج المرض الأساسي.
ثانيا الاهتمام ببيئة المريض المحيطه ونظافتها وتهويتها بشكل جيد .
علاج الفطر الأسود :
بيحتاج حسب درجته فترات متفاوته من أدوية مضادة الفطريات .. وللأسف الفطريات عموما في العين والجسم ممكن تاخد وقت طويل أسابيع في علاجها .
وممكن نلجأ لتدخل جراحي لإزالة أجزاء متعفنه ماينفعش علاجها دوائيا .
دكتور إبراهيم عبداللطيف
حكيم العيون
*** أي معلومات عالموقع هي بغرض التثقيف الطبي والتوعيه الصحية العامه ولا تغني بأي شكل من الأشكال عن الفحص الطبي المباشر.
