أكتر سؤال اتسألته الفترة اللي فاتت عن الذبابة السودا او الذبابة الطايره
عن النقط السوداء اللي الواحد ممكن يشوفها بتعوم قدامه FLOATERS
بتروح وتيجي
عددها غير ثابت من شخص للتاني
هل الذبابه الطايره خطر ؟
هل ممكن الذبابه الطايره تروح؟
ايه علاج الذبابه الطايره ؟
عشان نعرف احنا بنشوف الذبابه الطايره ليه لازم الأول نعرف جزء من تكوين العين الداخلي
اسمه “الجسم الزجاجي ” Vitrous Body
- ماهو الجسم الزجاجي؟
- متى تكون الذبابه الطائرة خطيرة ؟
- متى تكون الذبابه الطائرة طبيعية ؟
- ماهو علاج الذبابه الطائرة؟
ماهو الجسم الزجاجي؟
هو سائل لزج هلامي بيشغل اكبر حيز داخل العين
حواليه من اغلب الجهات ” الشبكية ” RETINA
ومن الأمام فقط ” عدسة العين ” LENS
بيتكون باختصار من ماء ومادة جيلاتينية
لازم يكونوا دايبين في بعض بتناغم عشان يفضل محتفظ بشفافيته
وبما انه بين العدسة والشبكية
فلو اصبح غير شفاف او فيه شوائب لأي سبب
ده هيعوق مسار الرؤية والصورة اللي بتيجي من برة لداخل العين
هيبقى بالظبط كأنك بتبص على محتوى حوض سمك شفاف مليان ميا صافيه
وحصل وبقى فيه عكارة او شوائب داخل الميا
ده هيخللي رؤية السمك غير واضحه وهتشوف الشوائب دي بتعوم قدامك
نفس التشبيه ده لو طبقناه عالعين هنفهم ليه بنشوف أي شوائب داخل الجسم الزجاجي
متى تكون الذبابه الطائرة خطيره ؟
السؤال هنا .. امتى تكون الشوائب دي خطر ؟ وبالتالي تكون الذلابه السودا الطايره خطر ؟
ده بيحصل لو اللي دخل الجسم الزجاجي ” دم ” Vitreous Hemorrhage
بغض النظر عن السبب زي ضغط الدم او مرض السكر أو اصابه او صدمه مباشره للعين
وقتها الدم ده محتاج تدخل طبي في اسرع وقت .
ولو حصل التهابات قزحية Uveitis
ممكن الالتهاب ده ينتج عنه وجود شوائب في الجسم الزجاجي
متى تكون الذبابه الطائرة طبيعية وغير خطيرة ؟
طيب امتى يكون وجود الذبابة الطايرة عادي ومفهوش خطورة ؟
لو كانت نتيجة تكتل في الجسم الزجاجي نفسه
وده غالبا بيحصل مع وجود قصر نظر او بيحصل مع التقدم في السن
وقتها لو اطمنا بفحص قاع العين ان الشبكية سليمه يبقى بننساه .تماما
وبنكتفي بمتابعة دورية كل ٦ شهور او سنه على قاع العين. وبكون حريصين لو ظهر اعراض أخرى مثل فلاشات او ومضات نور او ستارة سوداء . وقتها لابد من كشف سريع على قاع العين.
هل في علاج للذبابة الطائرة ؟
فيه حلول للذاباه الطايره العاديه
بس أغلبها فيه تدخل جراحي اما بجلسات ليزر او بتنظيف للجسم الزجاجي .. وطبعا بيكون غير مستحب لو الذبابه الطايره بسيطه اننا ندخل المريض في عملية ممكن يحصل منها مضاعفات .
بردو فيه دراسات ان المكملات الغذائية والفواكه زي الأناناس ممكن مع الوقت ” تقلل ” الذبابه الطايره.
طبعا لو كانت بسبب مرضي في الشبكية مثل انفصال طرفي او قطع في الشبكية او نزيف او التهابات . وقتها بيكون في ضرورة لعلاج السبب .
مين عنده الذبابه الطايره ومتعايش معاها ولا مسبباله مشكله ؟
ابعتولي في التعليقات او على قنوات السوشيال ميديا
دكتور ابراهيم عبداللطيف
حكيم العيون
**اي معلومات او مقالات على الموقع هي بغرض التثقيف والوعي الصحي العام ولا تغني بأي شكل من الأشكال عن الفحص الطبي المباشر.
شارك بتقييمك
شكرا لتقييمك
شارك برأيك وتعليقك
لو نزيف اعرف ازاي ؟