السكر ليه تأثير عالعين زي ماليه تأثير على كل الجسم . بس ايه الوضع مع الصيام ؟
مرض السكر من أشهر الامراض واكثرها انتشارا في العالم كله وفي العالم العربي
ناس كتير بيجيلها النوع الاول من وهم صغيريرن … وناس بيجيلهم على كبر
وفي الحالتين في اشخاص بيقدروا يتعايشوا معاه ويبعدوا قدر الامكان عن مشاكله
بس للأسف فيه بيتعاملوا مع السكر باستهتار لحد مايبدأ يدمر اجسامهم بالتدريج
ومن ضمن الفترات اللي بنقابل فيها مشاكل كتير مرتبطة بالسكر هي رمضان
..
في رمضان بنحتاج نصوم لعدد ساعات بيتراوح من 13 ل 16 ساعه تقريبا
مبيكونش فيهم لا أكل ولا شرب ولا دوا
وباقي ساعات الافطار بيكون اغلبها اكل وبيكون الغالب فيه كمية نشويات وسكريات كبيرة جدا
يمكن الكلام ده بالنسبة لأغلبنا بيتلخص في مين هيخس ومين وزنه هيزيد حسب نظامه واعتداله .
لكن
بالنسبة لمريض السكر الوضع ده بيعمل لخبطة في تعامل الجسم مع كمية وتوقيت دخول السكر في الجسم
ده غير مواعيد الدوا بالتزامن مع اللخبطة دي.
فيه مرضى سكر بيكون معدل السكر في اكلهم أعلى من الطبيعي HyperGlycemia
وفيه بيفتكروا انهم معتدلين وبياكلوا بشكل صحي بس بيفاجؤوا بمشكلة انخفاض السكر عن المعدل الطبيعي HypoGlycemia
الحالتين سواء زياده او نقص عن الطبييعي في الحقيقة خطر جدا جدا
بالنسبة لمجالي في طب العيون
الوضعين اي لخبطة في السكر في رمضان بتخلق مشاكل خطيره على العين زي :
1 – حدوث ارتشاح سوائل من الشرايين اللي بتغذي الشبكية .. ده بيكون مقدمة لمشاكل اكبر ده غير انه بيضعف النظر بشكل سلبي.
وحسب الفحص والأشعه عالشبكية بنحتاج تظبيط للسكر مع علاج دوائي مع حقن او جلسات ليزر .
2- حدوث نزيف من الشرايين اللي بتغذي الشبكية نتيجة تآكلها المستمر .. وده بيعمل زي ذبابة سوداء او خطوط او شبك عنكبوت بيشوفوا الشخص ..
وقتها بنفحص قاع العين فورا ولو احتجنا بنعمل أشعة بالصبغه وأشعه مقطعية .. وحسب نسبة النزيف بنقرر اما حقن او جلسات ليزر او عملية جراحية بننظف فيها الجسم الزجاجي والنزيف في اسرع وقت.
وللأسف وجود نزيف والتأخر في علاجه ممكن يعمل تليفات وقطع في الشبكيه و وتلف دائم وضرر في النظر.
3 – سرعة تدهور المياه البيضاء بحيث نسبة العتامة بتزيد بسرعه اكبر من الشخص العادي اللي بيجيله مياه بيضاء عادية نتيجة السن فقط .
4 – تغير في مقاس النظارة وده بيحصل نتيجة الضرر الحاصل في الشبكية .. وغالبا بعد مابيتعالج في اقرب وقت مقاس النظارة ممكن يرجع للوضع السابق قبل تدهور السكر .
طيب ايه الحل ؟؟
الحل أولا في الوقاية
لازم مريض السكر يكون معاه نظام غذائي ودوائي مخصوص بفترة الصيام بالرجوع للطبيب بتاعه .. ولو الطبيب نصحه بالتوقف عن الصيام فتره يبقى يلتزم ومايكابرش .
ومهم لو حصل لاقدر الله أي شكوى من النظر يرجع فورا لطبيب عيون _الأفضل طبعا يكون تخصص شبكية_ عشان يطمن على الشبكية ولو لاقدر الله لقى أي حاجه يبقى تتلحق في أولها احسن 100 مرة لو اتأخر عليها.
وربنا يحمي الجميع من كل سوء
ونفتكر ان مرض السكر لو تعاملنا معاه صح بنتعايش معاه بشكل صحي وسليم بدون مشاكل ان شاء الله
دكتور إبراهيم عبدالللطيف
حكيم العيون
**أي معلومات في الموقع هي بغرض التثقيف والوعي الصحي ولا تغني بأي شكل من الأشكال عن الفحص الطبي المباشر.
