العيد فرحه. وفيه اللمه والبهجه اللي بنحاول ننسى بيها هموم وضغوط كتير .
فمن المؤسف والمحزن ان تتحول الفرحه دي لمصيبة او حزن .
بنقابل سنويا مشاكل في العيون بتخللي صاحابها يقطعوا اعيادهم وفرحتهم بسببها.
هحاول هنا أذكر أشهر المشاكل اللي ممكن تيجي في العيون في الأعياد .. منها الخطير جدا ومنها البسيط .
1.إصابات العيون المباشره :
ودي اشهرها بيكون بسبب الألعاب الناريه ( البمب والصواريخ ) اللي الأطفال بيجيبوها بشكل او بآخر بعلم او بدون علم الأهل .
بنشوف منها حوادث زي انها تفرقع في عين الطفل ممكن تخللي العين تنفتح وتتصفى تماما .. أو تكون بعيد شوية والبارود او الرذاذ بتاعها يعمل حرق او قرحة في العين . نفس الشيء بيحصل من مسدسات الخرز اللعبه لما الأطفال بيوجهوها على بعض .
الحودث من النوع ده مفهاش هزار وممكن العين تفقد تماما ومينفعش فيها تأخير او نجيب أي دوا من الصيدلية . لازم طوارئ المستشفى في أسرع وقت ممكن . وبالفحص السريع بيتحدد هل هيتاخد دوا فقط ولا الطفل ممكن يحتاج عملية سريعه لإنقاذ عينه .
ونصيحة لوجه الله بلاش من أساسه الأطفال يلعبوا بالحاجات دي حفاظا على عيونهم .
2.قرح العيون من العدسات اللاصقة :
بنات كتير بتحب تلبس العدسات اللاصقة الملونه في الأعياد . وبغض النظر عن التحفظات العامة على لبسها .. بس العيد بيكون مصدر لالتهابات وتقرحات في القرنية ممكن توصل لحد الخطر وفقدان العين بسبب العدسات الملوثه والغير أصلية .
للأسف في بنات بتلجأ لمشاركة العدسات مع بعض وده بينقل عدوى من عين لعين بسرعه جدا . وفي بيلجأوا لأماكن غير موثوقه لشراء العدسات بحجة ان سعرها أرخص ودي اما بتكون مستعملة أو بتكون مضروبة ومصنعة بدون أي مواصفات أمان أو تعقيم . ودي كارثه وبنات كتير فقدوا عينهم واتشالت تماما بسبب العدسات دي.
وممكن تكون عدسة كويسه وأصلية بس بسبب ظروف الجو او طول لبسها في العيد بتسبب حساسية في العين .
النصيحة :
ممنوع مشاركة العدسات .
ممنوع شراء العدسات من أماكن غير موزعيها المعروفين من الشركات نفسها . وسهل الاتصال بالشركه ومعرفة موزعيها .
ممنوع لبس العدسات خارج اطار تعليمات ومدة الأمان المخصصه ليها .
ممنوع لبس العدسات لو اتقطعت او نشفت .
ممنوع لبس العدسات لو حصل التهاب او حساسية في العين لحد مالعين تتعالج تماما .
لو حصل التهاب شديد في العين أثناء لبس العدسات يجب زيارة طبي عيون او طوارئ عيون في اقرب مستشفى وعدم أخذ قطرات من الصيدلية بدون وصف خاصة لو فيها كورتيزون .. لأن لو المشكلة كانت قرحة عين ممكن الكورتيزون يخليها تزيد في ظرف ساعات وتصبح مشكلة تهدد العين كلها .
3.طوارئ الشبكية :
أشهر طوارئ الأعياد في الشبكية بتكون اما نزيف أو انفصال أو جلطات .
مهم جدا لو حصل أي حاجه منهم اللجوء في أسرع وقت لطوارئ عيون والاتصال بطبيب عيون شبكية .
خاصة مع اللي عندهم سابقة مشاكل في الشبكية نتيجة سكر أو ضغط دم عالي .
ولو أي شخص مرة واحده شاف كتلة سوداء امام عينه او ستارة سودا او تغير سريع في مستوى النظر يلجأ بسرعه للطوارئ لأنها وارد تكون مؤشرات لخطر حصل في شبكية العين .
ومهم أي مريض سكر او ضغط يحاول يحافظ على مستوى السكر وضغط الدم في العيد قدر الإمكان عشان يقلل فرص حدوث أي مشكلة خطر .
وأصحاب مشاكل ارتفاع ضغط العين الجلوكوما Glaucoma مهم جدا يكون معاهم علاجهم بالكامل ولو مسافرين ياخد معاه احتياطي كفايه . ولو حصل أي تدهور في النظر أو ألم مفاجئ يكشف فورا ويتأكد من قياس ضغط العين وحالة النظر وقاع العين .
عامل الوقت مهم جدا في علاج مشاكل الشبكية وممكن أي تأخير يسبب مشكلة أكبر.
وأخيرا وليس آخرا بنتمنى دايما الأعياد تمر بسلام وتكون كلها خير وفرحه بعيد عن أي حوادث في العين أو غير العين تنغص فرحة العيد .
ودايما الوقاية خير من العلاج
دكتور إبراهيم عبداللطيف
حكيم العيون
*** أي معلومات عالموقع هي بغرض التثقيف الطبي والتوعيه الصحية العامه ولا تغني بأي شكل من الأشكال عن الفحص الطبي المباشر.
